Sastra Jawa di Jawa Timur

Aming Aminoedhin
LAKON ANYAR

Lakon anyar saiki ajeneng omikron, aja
takon tekane saka ngendi. Sing baku
kudu luwih ngati-ngati, mlaku-sakmlaku
kudu tetep prokes. Supaya awak ora bisa
nganti ketularan, lan ora melu-melu
dadi nggreges.

Aja uga melu wong-wong sing rada
sembrana, ora maskeran ana njaban omah.
Kuwi mono ora prenah, iki isih jaman
pandhemi. Viruse sansaya gawe giris ati miris.
Jarene jeneng omikron, aja takon wae. Luwih
becik lakonana aturane. Tinimbang mung
mblarah ora genah, apik betah ana omah.
Donga ingkang kathah.

Lakon anyar aja mbok sengguh perkara
sing mayar, jarene crita luwih cepet nular.
Mula kudu tetep ihtiyar, aja nganti
melu kena tular. Aja nganti.

Mojokerto, 16/2/2022

*

herry lamongan
TITI MANGSA

sadurunge jangkep gagat rahina
peteng isih tumpuk undhung ing sanyari bumi
layang rineksa ing tabuh telu, megatruh lamat-lamat
ngukup wewayangan saka suku
duh, banget atis saka kuku
luhku tumetes binarung kumreseke gegodhongan
sansaya atis dening bun parak esuk

titi mangsamu, adhi
tinimbalan ijen kayadene nalikamu rawuh
ing pakeliran agung
nir ing bandha dunya nir ing dunya brana
marak seba marang Gusti dening Gusti
sangkan paraning dumadi

rah ing sirah lan sarira keseper
jeneng mung jalaran anggonira kondur marang suwung,
pawadane megatruh siningit
kang kawedhar saduruge padhang rahina. sapa nate ana
bakal ora ana, adhi
ora ana dening ana kang tansah langgeng salawase
kang ora malih ora ngalih