Puisi Minggu Ini: Para Penulis Guritan
KEMPALAN: Melengkapi ulasan tentang majalah “Panjebar Semangat” dan “Jaya Baya” saya sertakan beberapa guritan dari penulis yang guritannya pernah termuat di kedua majalah tersebut. Moga-moga saja bisa jadi bacaan indah, bernuansa daerah Jawa di minggu ini.
Herry Lamongan – LINCAK DHOYONG
ngedhep wedang kopi
ing lincak dhoyong
rembulan rampung candrakirana
wingi sore
tritisan sinuluhan konang
saka plataran,
tawang abyor lintang
madhangi pakeliran
”pageblug isih gemonthang
sadalan-dalan
riwe adhem isih tumetes
saparan-paran”
nyruput wedang
ing lincak dhoyong ing tritisan
gurit waspa mentiyung saka ngawiyat
netra kaca-kaca manah kaca-kaca.
bawana medhar sabda
sabdane korona
(28.08.2021)
Widodo Basuki – JATINING GURIT
guritan tinulis penggurit minangka panjerit
saka ati suwung ati liwung kelangan dunung
guritan tinulis tharik-tharik
nggunanake basa lungit
minangka gesanging anggit
asile semedi ing wayah sepi
minangka mantra suci
panggugah rasa jati
guritan dadi bantasing rasa pangrasa
ngusung swarane para sufi nalika ngumbara
dhewe emple ing tengah ara-ara
jatining gurit lololobah
wong urip kudu obah
gurite minangka mantra suci
panggugah rasa jati
(Sukolegok, 2022)
Aming Aminoedhin – DADIYA KAYA SRENGENGE
Ora perlu duwe ati nelangsa isih tetep
gelem nulis gurit, mesthi wis suwe akeh liyan
laku mantep padha ninggalake. Tetepa percaya
ana paedahe dina mburi, bisa melu nguri-uri
budaya bangsane. Ora perlu njerit mesthi
mung bisa nulis gurit sajlirit.
Dadiya kaya srengenge, tetep metu saben esuk
kanthi endah. Praupane sumringah nengsemake,
mesthi akeh manungsane tetep turu
ora gelem gumregah. Semono uga nulis gurit, ora
perlu njerit. Tetepa nulis mesthi ora ana sing maca,
ora perlu atimu lara. Tetepa gelem nulis guritan
sabendina ing jaman kebak waspa.
Dadiya kaya srengenge wayah esuk tetep metu
sabendina, sumringah lan endah. Nyebar berkah
waras kabeh manungsa, tanpa pilah-pilah.
Dadiya kaya srengenge!
Mojokerto, 25/7/2023 (06.22)
R Giryadi – MAGRIB SEPISANAN
Godhong-godhong kumlitir tir
kumlebat ing jroning pikir
wanci surup sirep
sireping wening kang bening
beninge tirta kang tumetes
ing telenge batin.
Batin kang ngumbara bara
mrih nemoke cukuling winih
winih mranti kang ngiwi-ngiwi
kawit wingi uni.
Ning sejatine aku pasrah
sumrambah marang Gusti Allah
ora bakal selak yen winih-winih
wus sumebar mbabar sak jembare
wit kang ginelar.
Ya mung marang sira
sira kang sinengku ing pucuking magrib
magrib kang kajuwing-juwing
karanta-ranta njaluk palilah
marang kang maha miwah.
Magrib iki magrib sapisanan
ana suwara mbrengengeng ngeng
kaya suwara salawatan
salawating godhong godhong
kumlebat liwat kaya ndaru
cumlorot kaya cahyaning
raja sapisanan.
2016
(*) Aming Aminoedhin
