Guritan Minggu Ini dari PPJS
Aming Aminoedhin
GURIT BANDHA DONYA
Nguber bandha donya nora ana enteke
Mbok diubera nganti pethite angin
Isih ana kang durung kecekel rasa pengin
Manungsa mono kanggonan lali
Nguber bandha donya tan kira-kira
tan kaya ngapa. Sirah dadi sikil, sikil dadi sirah
Njungkir-njempalik nguber donya lali wayah
lali kanca lan sapadha-padha, uga lali
manembah marang Gusti Allah
Bandha donya wis kecekel, tapi awak
dadi rusak. Kelangan sanak, kelangan Gusti
kang paring rejeki. Awak lungkrah
nora obah. Dadi kembang amben
sakwen-wen. Mati nora gelem, urip mung
ngentekke bandha donyane
Gurit bandha donya iki
apa arep mbok tiru tembe mburi?
Mojokerto, 13/5/2011
*
R Djoko Prakosa
AWU ING PUCUK WUWUNGAN
isih ana awu
ing pucuk wuwungan
selagine mripatku
+Mu…
liru urubing
geni ing pucuking
rasa…..
ing
wuwungan awu sucimu..
rumesep kesdu jroning
kalbu ku
+mu
Klampis, 12 Maret 2014
*
Deny Try Aryanti
TEMBANG PENDHAPA JAWA ( I )
Sapucuking driji kang ora karupa nggayuh lintang
rasa iki kasebat saklebating ati kauja dening katresnan
sing katutup mendung
sawetara getih kang mili ing sakabehing nyawa
karasa saya sumresep njojoh kasunyatan
ing sakedeping mata
Kanggomu lelakon kang sumringah datan bisa nglalekake
nyenyeting ati nganti pucuking langit ora kawates
ana kene aku mung ngenteni pecahing rasa
saka langit lan bledhek kang wingit
ing sautering lemah teles
Trenggalek, Feb 2003
*
Trinil
SINGA IJEN
Aku singa
Sing wis kadhung nasaki carang
Kasil mlebu alas sangar
Dilulu daging seger anyar
Nggarahi kemecer kudu ngganyang.
Tapi endi kewan-kewan liyane?
Gak onok singa lanang?
Onoke bantheng ketaton, gagak rimang,
menjangan brahi, utawa celeng uber-uber kidang.
Aku kijenan gak nde rewang
Mlaku nang awang-awang
Dulinanku ayang-ayang!
Malang, wulan Sela karek sedina, 2006
*
Suharmono K.
KEMBANG SAGAGANG KANG KASANGSANG
kembang sagagang kang kasangsang, adhuh Rama!
dakwudhari benang-benang ruwet kang lagi njiret
tatu bingget, nabet ing telenge ati, singset
yen arume sekar iku gegayuhan mulya
adhuh Rama!
wus dak lari ing telenge leng semut geni
susuhe angkrang lan astanane syetan
kang tinemu amung geni abang
lan peteng lelimengan
yen pancen ana telenge samodra
yagene kang tinemu amung prahara
kembang sagagang kang kasangsang, adhuh Rama!
yen cumlorot iku pulung
bareng dakcekel jebul ndaru gruwung
apa aku kurang waspada?
amarga prayitna iku ajaranmu kang mulya
drengki lawas wus dakadohi
srei barang kang malati
Surabaya, Juni 1984
Jaya Baya, 7 Oktober 1984
*
Widodo Basuki
PITAKON
ora usah takon menyang endi playune
dibujung wae : lepase panyawang iki!
bareng keplase angen-angen
ngudhuni juranging rasa rumangsa
ngunggahi tawang towanging puja
tembus laladan-laladan bawera
luru wiwaraning wewarah
ing ngendi jatining sumarah
ditutne wae: lepase napas iki!
kaya grojogan mili, tan ana pedhote
krenggosan antarane sanggan lan paran
endi lan endi tumuju
ing sarandhuning angga gumeter
geter tinabuh, saka siji bali siji
swarane mantul-mantul
ing jagad adi
2012
